- bernage
- Bernage, m. pen. C'est toute la suite, train, compagnie et equippage d'un grand seigneur, tant en sommiers qu'autre equippage, ou bien l'appareil et l'agent de la maison d'un Roy, comme, Il tint cour planiere, et en icelle manda tout son bernage; et tous les Barons et Chevaliers de son pays, Comitatus, et en ceste sorte se prend quelque fois pour la Cour d'un Prince, et quelquefois pour l'ost et armée d'iceluy, comme on voit és anciens Romans, on en use aussi pour bagaige et hardes, Impedimenta, Sarcinae, ainsi trouve on escrit, le bernage de la chasse, pour dire l'equippage des veneurs, allans à l'assemblée, Bernage aussi anciennement se prenoit pour la meslange de ces especes de grains froment, orge, segle, mais ce mot en ceste signification n'est qu'entre bien peu de laboureurs en usage, ains use on de ce mot Moulture, ou bled moulture, Il estoit paradvanture ainsi dit par imitation de la meslange de toutes manieres de hardes, qui pour l'equippage et service d'un grand seigneur marchant en Campagne, sont portées sur sommiers, ou charroy, qui sont signifiés par ce mot Bernage, comme dit est.en aucunes contrées de ce royaume on dit bled bernage, ou grain bernage, pour tel bled ou espece de grain qui vient et croit au terroir particulier du pays, comme le fermier rend à son maistre tant de muyds de grain bernage par an, c'est à dire de tels grains qui viennent et croissent és terres de sa ferme, et en ceste signification le mot semble venir de cestuy Latin Verna, qui signifie un serf ou esclave nay chez nous d'une ou d'un nostre esclave, aussi Arua a nobis subiguntur, quodque ferunt, quasi domi nostrae natum videtur? Et rapporteroit aucunement à la premiere signification devant dite, parce que le bernage d'un seigneur, est proprement la suyte, train, et compagnie de ses domestiques, comme si on disoit vernage, Famulitium, famulorum grex, comme Cic. In Pisonem, dit grex nouitiorum.
Thresor de la langue françoyse. Jean Nicot.
